Ons storie

Ons storie

Bakenshoogte is ‘n 5.5 ha plasie, wat afgesny is van een van Botrivier se historiese plase, nl Compagniesdrift. Ons lê teenaan die N2 op die pad na Hermanus. Die ander bure is die Kogelberg natuurreservaat en Wildekrans wyne.

Bakenshoogte is die trotse eiendom van Johan en Wilma Punt. Ons twee seuns, Gilbert en Hendri, asook ons baie energieke bloedhond, Jake, vorm deel van ons familie.  Die verweerde tafelbergsandsteen is ‘n goeie pasmaat vir ons olyfbome. Die eerste boord is gevestig in 2005 en in 2006 is ‘n tweede boord aangeplant. Waarom olyfbome sou u waarskynlik vra? Ons het baie dinge probeer  – selfs pragtige wit dorper-stoetskape – maar ongelukkig proe ‘n stoetskaap se vleis dieselfde as enige ander skaap s’n! So… olyfbome was ‘n opsie, want wie eet nou olywe vanaf die bome? Buitendien het Johan iets  gesoek om sy vrou uit die onderwys te kry en meer by die boerdery te betrek!

Die olyfboord bestaan uit Italiaanse olyfvariteite en bestaan uit die vlg: 50% Frontoia, 30% Leccino en 20% Corotina. Klein aanplantings van Favolosa en Nocellaro word tansgedoen om ‘n verdere vrugtige en neutsmaak in die olie te bring.

Die olyfboom is ‘n heilige boom wat dateer uit die Bybelse tye en daarom word ons bome met groot respek en liefde  hanteer!

Ns. Ons dorperskape het intussen verhuis na ons plaas by Dewetsdorp in die Vrystaat– maar daaroor later!